Discipula María Ibáñez praemio honorata est

Hesterno die, qui dies fuit vicesimus mensis Novembris ann. MMXX, honorata est discipula nostra María Ibáñez praemio, quod dicitur, «ex aequo» a SOCIETATE HISPANICA STVDIORVM CLASSICORVM (vulgo SEEC). Defenderat María anno praeterito opusculum in cursu illo futuris magistris dicato, in quo discipuli docendi rationes discunt et exercent. Finem ut imponeret cursui, scripserat opusculum de Livia Drusilla, in quo nonnisi Latine fundamenta docendi iecit, rationes descripsit atque fabulam notissimae feminae narravit. Hic nuntiavimus anno praeterito quid factum sit. Euge, María, de tanta discipula gloriamur. FINIS CORONAT OPUS!

Jorge Tárrega

21.XI.2020

Publicado en General | Deja un comentario

DE CATVLLO in Vniversitate PRAELEGENDO

Inter incepta VALENTIAe VIVAe numeratur studium scholas excipiendi coram discipulis Vniversitatis Valentinae habitas. Ecce scholarum exemplum, in quo ipse Catullum anno MMXIX exeunte praelegi in disciplina «Prolegomena in Philologiam Classicam» nuncupata. Scholam, quam spectatis, audiverunt discipuli primi cursus Philologiae, quae dicitur, Classicae.

Licet, si placuerit, subtitulis Latinis uti, quos in dextero ligamine aperietis.

Plures pelliculae, quas habuimus in animo excipere ac in lucem edere, fieri non poterunt propter luem illam coronariam, quae his mensibus in totum orbem terrarum saevit.

Publicado en General | Deja un comentario

SCHOLAE LATINAE INITIVM CAPIVNT. VALENTIA VIVAST!

Proximo die XXVIII huius mensis initium capient SCHOLAE LATINAE in Vniversitate Studiorum Valentina. Agitur, ut mense Octobri praeterito nuntiavimus, de consilio VALENTIA VIVA, quod consilium per totum annum academicum multis inceptis, versipellis quidem instar, volvitur.

XXV discipuli, qui Studiis Classicis operam dant in Vniversitate Valentina, sua voluntate, nulla mercede soluta, nullo beneficio academico promisso, nomen scholis dederunt. Erit mihi honori una cum Aloisia Aguilar discipulos eo animo iuvare, ut Latine loquendi et legendi facultatem exerceant et amplificent. Plura mox narrabimus!

Valentiae, a. d. IX Kal. Febr. ann. MMXX

Publicado en General | Deja un comentario

SEMINARIVM LATINITATIS IN VNIVERSITATE NOSTRA PERACTVM

Nudius tertius Seminarium, quod inter inceptum VALENTIAM VIVAM numeratur, factum est in antiqua sede Vniversitatis Valentinae ope et auxilio Consociationis Collegii Latinitatis. Hic spectari possunt imagines ibi exceptae. Gratias agimus moderatoribus antiquae Vniversitatis sedis LA NAU, ubi licuit nobis mutuari auditoria. Valentia vivit, Valentiae enim de factis Romanorum memorabilibus sermo Latinus adhibitus est multas per horas.

Publicado en General | Deja un comentario

SEMINARIVM LATINVM VALENTIAE HABENDVM!

Multa sunt seminaria multique sunt conventus in quibus homines docti suas pervestigationes ita partiuntur, ut fiant colloquia et doctrina pervulgetur. Valentiae quidem proximo die 5 huius mensis Octobris, qui dies erit Saturni, habebitur mane II SEMINARIUM COLLEGII LATINITATIS, quod favebit VALENTIA VIVA, inceptum Vniversitatis nostrae. Octo tradentur oratiunculae eaeque omnes Latine. Vehementer suadeo ut veniatis, discatis et gaudeatis.

Aditus omnibus patebit gratuito, dummodo sint sellae in promptu. Ecce nexus ad seminarium. Venitote frequentes!

Publicado en General | Deja un comentario

De aetate Humanistica, de studiis Humanitatis

His nuperimis diebus multa diximus in scholis de studiis Humanisticis, de Valla, de Erasmo deque multis aliis. Ecce vobis dabo ligamena quibus possitis omnia, quae diximus, perscrutari atque perpendere:

  • Lexicon Forcellinianum. Scitote iamdiu esse omnibus in promptu “digital version”.
  • Brevissima pellicula (13min) in qua magister Helvetius nomine Beat Jung loquitur de STUDIIS HUMANITATIS, de Erasmo deque aetate renatarum artium.
  • Oratio magistri Itali (24min) nomine Luigi Miraglia. Vehementer suadeo ut subtitulos Latinos aperiatis, quo melius et facilius orationem sequamini. In hac oratione L. Miraglia loquitur inter alia de mutatione, de qua in scholis nunc disserimus, inter aetatem Humanisticam et saeculum XIX.
  • Opera Comenii: digital version

Haec hactenus. Bene valete

Publicado en General | Deja un comentario

VALENTIA VIVA

CONSILIVM NOVIS DOCENDI RATIONIBVS IN VNIVERSITATE STVDIORVM VALENTINA QVAERENDIS ET ADHIBENDIS

Mense Septembri ineunte placuit moderatoribus Vniversitatis Studiorum Valentinae Consilium, c.n. “VALENTIA VIVA”, novis docendi rationibus quaerendis et adhibendis (Proyecto de Innovación docente 2019/2020-6700600000) probare et confirmare. Agitur quidem de consilio, cui toto anno academico Vniversitas favebit, scholas Latinas in Facultate tradendi, excipiendi et quoquoversus pervulgandi, seminaria ordinandi, lustrationes moderandi, testimonia fulciendi, operam una cum aliis societatibus dandi multaque hoc genus incepta conflandi. Quae omnia nonnisi Latine ordinabuntur.

Hoc consilium Vniversitatis Studiorum Valentinae aliis consiliis Vniversitariis additur quae nunc per totum orbem terrarum numerantur. Quorum consiliorum quaedam indistincte atque promisce annotamus documento:

Pluraque sunt incepta, quorum indicem hic longum sit enumerare! Volumus proximis mensibus multa ordinare quae auxilio sint non solum discipulis Valentinae Vniversitatis, sed omnibus linguam Latinam discentibus. Suo tempore omnia nuntiabimus hac in pagina.

Jorge Tárrega

Moderator Consilii VALENTIAE VIVAE

Dabam Valentiae, a. d. XII Kal. Oct. ann. MMXIX

Vniversitas
Gaditana
(Hispania)
Consilia novis docendi rationibus quaerendis et adhibendis: -2017-2018. Cod. sol-201700082105-tra -2015-2016. Cod. SOL-201500054148-TRA -2013-2014. Cod. AAA-14-003 -2011-2012: Cod. PI2-12-014 -2009-2010: Cod. PIE 22 -2006-2007: Cod. IN07
Vniversitas
Malacitana
(Hispania)
-2018: (Proyecto de Innovación Educativa 17-174 Vniversitatis Malacitanae atque Consociationis culturaclasica.com) Conventus omnium gentium “Novae Viae
-2019: Conventus omnium gentium “Novae Viae II”
-2010-2018: Commentarii periodici Thamyris de rebus didascalicis
Vniversitas
Hispalensis
(Hispania)
– Enchiridion “Lectiones Latinae”, Ediciones de la
Universidad de Sevilla. Premium: Premio Nacional de Edición Universitaria

Vniversitas
Autònoma
Barcinonensis

(Hispania)

-2014-2019 Cursus annuus
Colloquia Barcinonensia
Vniversitas
Holmiensis
(Suetia)
-2018 Seminarium auctoribus antiquis legendis
-2017 Seminarium omnium gentium
“Stodgy Philology” scholis Vniversitariis tradendis
Vniversitas
Oxoniensis
(Britannia)
-2017-2019 Oxford Latinitas Project

Vniversitas
Princetoniensis  (Civitates Americae Foederatae)

-2019 Seminarium annuum Latinitatis
Vniversitas
Kentuckiana,
Institute for Latin Studies (Civitates  Americae Foederatae)
Scholae Latinae
Seminaria de auctoribus
Publicado en General | Deja un comentario

Christianus sum, non Ciceronianus!!!!!

Heri in scholis nostris locum legimus in quo Hieronymus narrat somnium. Fuit enim saeculo V pCn tempus quo haud pauci homines docti cunctabantur in vita: deberentne Christianismum an auctores antiquos complecti? Heu, difficile dictu! Hieronymus maxime, ut heri diximus, excruciabatur! Ecce, si volueritis, spectabitis pelliculam in qua, subtitulis instructis, locus Hieronymi Latine explanatur.

Ecce locus (Epistula ad Eustoquium, 22, 30):

«Cum ante annos plurimos domo, parentibus, sorore, cognatis, et quod his difficilius est, consuetudine lautioris cibi, propter coelorum me regna castrassem, et Hierosolymam militaturus pergerem, Bibliotheca, quam mihi Romae summo studio ac labore confeceram, carere non poteram. Itaque miser ego lecturus Tullium, ieiunabam. Post noctium crebras uigilias, post lacrimas, quas mihi praeteritorum recordatio peccatorum ex imis uisceribus eruebat, Plautus sumebatur in manibus. Si quando in memet reuersus, prophetam legere coepissem, sermo horrebat incultus; et quia lumen caecis oculis non uidebam, non oculorum putabam culpam esse, sed solis. Dum ita me antiquus serpens illuderet, in media ferme quadragesima medullis infusa febris, corpus inuasit exhaustum et sine ulla requie –quod dictu quoque incredibile sit– sic infelicia membra depasta est, ut ossibus uix haererem. Interim parabantur exequiae, et uitalis animae calor, toto frigente iam corpore, in solo tantum tepente pectusculo palpitabat, cum subito raptus in spiritu, ad tribunal iudicis pertrahor, ubi tantum luminis, et tantum erat ex circumstantium claritate fulgoris, ut proiectus in terram, sursum aspicere non auderem. Interrogatus condicionem, Christianum me esse respondi. Et ille qui residebat: “mentiris“, ait, “Ciceronianus es, non Christianus“: ubi thesaurus tuus, ibi et cor tuum. Illico obmutui, et inter uerbera –nam caedi me iusserat– conscientiae magis igne torquebar».

Publicado en General | Deja un comentario

Lingua Latina mortua est… Vivat lingua Latina!

In scholis nostris dum tractantur Ars edendi, Historia Philologiae Classicae, instrumenta disciplinae nostrae multaque alia, vobis erit legendum opusculum a professore Stroh conscriptum. Suadeo ut attente librum legatis et auctoris verbis et doctrina gaudeatis. Ecce vobis subicio indicem interrogatorum. Fruimini libro!

Publicado en General | Deja un comentario

De Historia Philologiae Latinae

Heri prima in schola Philologiae Classicae locuti sumus duas per horas de primis grammaticis atque de initiis artis grammaticae. Qui homines primi docuerunt Romae artem grammaticam? Placuit mentionem facere de Aelio Stilone et multis aliis, quorum locos selectos perlegimus atque descripsimus. Ecce, discipuli, vobis apponam documentum, quod potest vobis auxilio esse. At cavete: plurima alia diximus in scholis! Proximo die Medium, quod dicitur, Aevum multaque alia tractabimus.

Publicado en General | Deja un comentario