Tribus mensibus peractis multisque rebus coram tractatis, nunc conuenit —neglegere nefas— omnia colligere, exercere et memoriae mandare, quo doctiores in dies, discipuli, fiatis. Quare uobis praebere constitui exemplum probationis mense proximo Ianuario habendae. Quod exemplum diuiditur in partes tres, unam de expositione thematis in scholis traditi, secundam de praxi multorum exemplorum, tertiam quae paragraphum textus complectitur a nobis amplissime excussi. Si quis uestrum uoluerit me hanc exercitationem castigare, referat ad meam inscriptionem electronicam. Libenter corrigam et extemplo remittam retractatam. Ceterum, cum scholae sint omnes Latine traditae etiamque uos Latino sermone uteremini et in quaestionibus et in expositionibus, forsitan aliquis uestrum habeat in animo Latine respondere in probatione. Maximi id, si quis hoc fecerit, aestimabitur.
Annum nouum faustum uobis et ad omnia, quae recte cupitis, prosperum precor