SEMINARIVM LATINITATIS IN VNIVERSITATE NOSTRA PERACTVM

Nudius tertius Seminarium, quod inter inceptum VALENTIAM VIVAM numeratur, factum est in antiqua sede Vniversitatis Valentinae ope et auxilio Consociationis Collegii Latinitatis. Hic spectari possunt imagines ibi exceptae. Gratias agimus moderatoribus antiquae Vniversitatis sedis LA NAU, ubi licuit nobis mutuari auditoria. Valentia vivit, Valentiae enim de factis Romanorum memorabilibus sermo Latinus adhibitus est multas per horas.

Publicado en General | Deja un comentario

SEMINARIVM LATINVM VALENTIAE HABENDVM!

Multa sunt seminaria multique sunt conventus in quibus homines docti suas pervestigationes ita partiuntur, ut fiant colloquia et doctrina pervulgetur. Valentiae quidem proximo die 5 huius mensis Octobris, qui dies erit Saturni, habebitur mane II SEMINARIUM COLLEGII LATINITATIS, quod favebit VALENTIA VIVA, inceptum Vniversitatis nostrae. Octo tradentur oratiunculae eaeque omnes Latine. Vehementer suadeo ut veniatis, discatis et gaudeatis.

Aditus omnibus patebit gratuito, dummodo sint sellae in promptu. Ecce nexus ad seminarium. Venitote frequentes!

Publicado en General | Deja un comentario

De aetate Humanistica, de studiis Humanitatis

His nuperimis diebus multa diximus in scholis de studiis Humanisticis, de Valla, de Erasmo deque multis aliis. Ecce vobis dabo ligamena quibus possitis omnia, quae diximus, perscrutari atque perpendere:

  • Lexicon Forcellinianum. Scitote iamdiu esse omnibus in promptu “digital version”.
  • Brevissima pellicula (13min) in qua magister Helvetius nomine Beat Jung loquitur de STUDIIS HUMANITATIS, de Erasmo deque aetate renatarum artium.
  • Oratio magistri Itali (24min) nomine Luigi Miraglia. Vehementer suadeo ut subtitulos Latinos aperiatis, quo melius et facilius orationem sequamini. In hac oratione L. Miraglia loquitur inter alia de mutatione, de qua in scholis nunc disserimus, inter aetatem Humanisticam et saeculum XIX.
  • Opera Comenii: digital version

Haec hactenus. Bene valete

Publicado en General | Deja un comentario

VALENTIA VIVA

CONSILIVM NOVIS DOCENDI RATIONIBVS IN VNIVERSITATE STVDIORVM VALENTINA QVAERENDIS ET ADHIBENDIS

Mense Septembri ineunte placuit moderatoribus Vniversitatis Studiorum Valentinae Consilium, c.n. “VALENTIA VIVA”, novis docendi rationibus quaerendis et adhibendis (Proyecto de Innovación docente 2019/2020-6700600000) probare et confirmare. Agitur quidem de consilio, cui toto anno academico Vniversitas favebit, scholas Latinas in Facultate tradendi, excipiendi et quoquoversus pervulgandi, seminaria ordinandi, lustrationes moderandi, testimonia fulciendi, operam una cum aliis societatibus dandi multaque hoc genus incepta conflandi. Quae omnia nonnisi Latine ordinabuntur.

Hoc consilium Vniversitatis Studiorum Valentinae aliis consiliis Vniversitariis additur quae nunc per totum orbem terrarum numerantur. Quorum consiliorum quaedam indistincte atque promisce annotamus documento:

Pluraque sunt incepta, quorum indicem hic longum sit enumerare! Volumus proximis mensibus multa ordinare quae auxilio sint non solum discipulis Valentinae Vniversitatis, sed omnibus linguam Latinam discentibus. Suo tempore omnia nuntiabimus hac in pagina.

Jorge Tárrega

Moderator Consilii VALENTIAE VIVAE

Dabam Valentiae, a. d. XII Kal. Oct. ann. MMXIX

Vniversitas
Gaditana
(Hispania)
Consilia novis docendi rationibus quaerendis et adhibendis: -2017-2018. Cod. sol-201700082105-tra -2015-2016. Cod. SOL-201500054148-TRA -2013-2014. Cod. AAA-14-003 -2011-2012: Cod. PI2-12-014 -2009-2010: Cod. PIE 22 -2006-2007: Cod. IN07
Vniversitas
Malacitana
(Hispania)
-2018: (Proyecto de Innovación Educativa 17-174 Vniversitatis Malacitanae atque Consociationis culturaclasica.com) Conventus omnium gentium “Novae Viae
-2019: Conventus omnium gentium “Novae Viae II”
-2010-2018: Commentarii periodici Thamyris de rebus didascalicis
Vniversitas
Hispalensis
(Hispania)
– Enchiridion “Lectiones Latinae”, Ediciones de la
Universidad de Sevilla. Premium: Premio Nacional de Edición Universitaria

Vniversitas
Autònoma
Barcinonensis

(Hispania)

-2014-2019 Cursus annuus
Colloquia Barcinonensia
Vniversitas
Holmiensis
(Suetia)
-2018 Seminarium auctoribus antiquis legendis
-2017 Seminarium omnium gentium
“Stodgy Philology” scholis Vniversitariis tradendis
Vniversitas
Oxoniensis
(Britannia)
-2017-2019 Oxford Latinitas Project

Vniversitas
Princetoniensis  (Civitates Americae Foederatae)

-2019 Seminarium annuum Latinitatis
Vniversitas
Kentuckiana,
Institute for Latin Studies (Civitates  Americae Foederatae)
Scholae Latinae
Seminaria de auctoribus
Publicado en General | Deja un comentario

Christianus sum, non Ciceronianus!!!!!

Heri in scholis nostris locum legimus in quo Hieronymus narrat somnium. Fuit enim saeculo V pCn tempus quo haud pauci homines docti cunctabantur in vita: deberentne Christianismum an auctores antiquos complecti? Heu, difficile dictu! Hieronymus maxime, ut heri diximus, excruciabatur! Ecce, si volueritis, spectabitis pelliculam in qua, subtitulis instructis, locus Hieronymi Latine explanatur.

Ecce locus (Epistula ad Eustoquium, 22, 30):

«Cum ante annos plurimos domo, parentibus, sorore, cognatis, et quod his difficilius est, consuetudine lautioris cibi, propter coelorum me regna castrassem, et Hierosolymam militaturus pergerem, Bibliotheca, quam mihi Romae summo studio ac labore confeceram, carere non poteram. Itaque miser ego lecturus Tullium, ieiunabam. Post noctium crebras uigilias, post lacrimas, quas mihi praeteritorum recordatio peccatorum ex imis uisceribus eruebat, Plautus sumebatur in manibus. Si quando in memet reuersus, prophetam legere coepissem, sermo horrebat incultus; et quia lumen caecis oculis non uidebam, non oculorum putabam culpam esse, sed solis. Dum ita me antiquus serpens illuderet, in media ferme quadragesima medullis infusa febris, corpus inuasit exhaustum et sine ulla requie –quod dictu quoque incredibile sit– sic infelicia membra depasta est, ut ossibus uix haererem. Interim parabantur exequiae, et uitalis animae calor, toto frigente iam corpore, in solo tantum tepente pectusculo palpitabat, cum subito raptus in spiritu, ad tribunal iudicis pertrahor, ubi tantum luminis, et tantum erat ex circumstantium claritate fulgoris, ut proiectus in terram, sursum aspicere non auderem. Interrogatus condicionem, Christianum me esse respondi. Et ille qui residebat: “mentiris“, ait, “Ciceronianus es, non Christianus“: ubi thesaurus tuus, ibi et cor tuum. Illico obmutui, et inter uerbera –nam caedi me iusserat– conscientiae magis igne torquebar».

Publicado en General | Deja un comentario

Lingua Latina mortua est… Vivat lingua Latina!

In scholis nostris dum tractantur Ars edendi, Historia Philologiae Classicae, instrumenta disciplinae nostrae multaque alia, vobis erit legendum opusculum a professore Stroh conscriptum. Suadeo ut attente librum legatis et auctoris verbis et doctrina gaudeatis. Ecce vobis subicio indicem interrogatorum. Fruimini libro!

Publicado en General | Deja un comentario

De Historia Philologiae Latinae

Heri prima in schola Philologiae Classicae locuti sumus duas per horas de primis grammaticis atque de initiis artis grammaticae. Qui homines primi docuerunt Romae artem grammaticam? Placuit mentionem facere de Aelio Stilone et multis aliis, quorum locos selectos perlegimus atque descripsimus. Ecce, discipuli, vobis apponam documentum, quod potest vobis auxilio esse. At cavete: plurima alia diximus in scholis! Proximo die Medium, quod dicitur, Aevum multaque alia tractabimus.

Publicado en General | Deja un comentario

De vita LIVIAE DRUSILLAE in Vniversitate Studiorum Valentina Latine scripta atque defensa

Nuperrimis diebus nostra in Facultate opusculum didascalicum Latine defensum est, nobis monentibus, a discipula María Ibáñez, cuius opusculum, etiam Latine elegantissime conscriptum, res est necessaria et ultimum periculum ad veniam, quae dicitur, docendi impetrandam. Itaque est iam María vocanda “magistra”, quod periculum superavit atque palmam tulit.

Opusculo Mariae index fuit LIVIA DRUSILLA. Sic enim narrata est vita tantae mulieris, quae vixit in rei publicae discrimine atque uxor, mater itemque avia imperatorum fuit. Decrevit enim María «fabulam de rebus gestis Romanorum componere atque vitam notissimae feminae seligere, quae haud sine controversia suas partes egit». Maximam operam dedit María ut liber linguae latinae tironibus esset in promptu: selegit vocabula faciliora, apposuit imagines, annotavit explanationes atque structurarum grammaticarum difficultates sedavit. Vtinam possit discipula nostra librum quodammodo edere ut tirones totius orbis terrarum fructus capiant in legendo!

Publicado en General | Deja un comentario

Thesis doctoralis de methodis didascalicis Pompaeloni habita

Heri in Vniversitate Studiorum Navarrensi, Pompaeloni, quae urbs ad Septentriones Hispaniae spectat, fuit mihi honori numerari inter iudices theseos, cui index erat «Fondamenti teorici e storici dell’ applicazione del metodo induttivo-contestuale all’insegnamento della lingua latina». Federicus Pirrone, mane candidatus, vesperi iam doctor academicus, quamquam tantum Italice opus exaraverat, defendit dissertationem suam Italice, Hispanice et Latine, nam et in verbis aditialibus et in sermonibus mecum habitis, elegantissime lingua Latina ex tempore usus est. Patefecit enim linguam latinam per multa saecula per usum traditam esse, haud secus ac Comenius monebat: «audiendo, legendo, relegendo, imitationem manu et lingua temptando quam creberrume». Addendast igitur haec defensio Latina ad theses Latine conscriptas vel pro tribunali Latine defensas, ut puta dissertationes Aloisiae Aguilar (Valentiae MMXV, de Varrone), G. Vindigni (Cataniae MMXVII, de Caesare) et R. Navarro (Hispali MMXVIII, de Augustino). Huc adde theses de methodis didascalicis, inter quas numerantur dissertationes E. Engelsing (Gadibus, Hispania, MMX), M. Ricucci (Vtini, Italia, MMXV). G. López de Lerma (Barcinoni, Hispania, MMXVI) et M.E. Lloyd (Londinii, Britannia, MMXVI).

Publicado en General | Deja un comentario

Vniversitas Studiorum Valentina Latine loquitur

Nuperrimis diebus opuscula Latine defensa sunt a Rayco García et Iosepho Sánchez, quorum opuscula, etiam Latine elegantissime conscripta, res sunt necessaria et ultimum periculum ad veniam, quae dicitur, docendi impetrandam. Itaque sunt iam vocandi “magistri”, quod periculum superaverunt, immo iudices opuscula aestimaverunt maximi ponderis et momenti (quod Hispanice “10” dicitur).

Raycus García Perdomo Veneris die defendit “De Bello Gallico: editio didascalica, nonnullis mutatis et praetermissis”, in quo opusculo:

 

 

 

 

  • eo modo excerpsit locos e Bello Gallico, ut narratio omnino congrueret neve quicquam officeret discipulis lyceorum quominus legerent et filum tenerent narrationis.

  • sic editionem adnotatiunculis in marginibus auxit, ut discipuli manu ducerentur.

  • tot exercitiis iisque variis locupletavit studium, ut grammaticam et narrationem ipsam corroborarent alumni.

Iosephus autem Sánchez Tarazaga verba fecit Latina pro tribunali de suo “Adire tamquam multorum hereditatem iuvat. Loci selecti: editio didascalica et exercitationes”. Selegerat Iosephus plurimos locos ex Gellio, ex Cicerone vel ex Phaedro eosque diversis explanationibus et exercitiis ornaverat. Discipuli in lyceis gustabunt exercebunt gaudebunt. Adibunt denique, Seneca monente, multorum hereditatem.

 

 

 

 

Hoc dici oportet, Iosephum Sánchez et Raycum García magnam operam navavisse a mense Decembri, fere cotidie se Latine scribendo dedisse, ut eleganter exararent opusculum. Finis coronat opus.

Publicado en General | Deja un comentario